వార్షిక ఉత్పత్తి లక్ష్యాన్ని ముందుగానే సాధించిన ఎన్టీపీసీ

జాతీయ విద్యుత్‌ సంస్థ రామగుండం సూపర్‌ థర్మల్‌ విద్యుత్‌ కేంద్రం 2012-13 ఆర్ధిక సంవత్సరానికి నిర్థేశించిన విద్యుత్‌ ఉత్పత్తి లక్ష్యాన్ని గడువు కన్నా ఐదు రోజుల ముందుగానే సాధించింది. మన రాష్ట్రంలో విద్యుత్‌ కోతలు, విద్యుత్‌ చార్జీలు వంటి సమస్యలతో పోరాటాల మంటలు రగులుతున్న సమయంలో రామగుండం సూపర్‌ థర్మల్‌ విద్యుత్‌ కేంద్రం నిర్ణీత గడువు కన్నా ముందుగానే వార్షిక విద్యుత్‌ ఉత్పత్తి లక్ష్యాన్ని సాధించి సంచలనం సృష్టించింది. మూడు 200 మెగావాట్ల యూనిట్లు, నాలుగు 500 మెగావాట్ల యూనిట్లు కలిసి రోజుకు 2600 మెగావాట్ల విద్యుత్‌ను రామగుండం సూపర్‌ థర్మల్‌ విద్యుత్‌ కేంద్రంలో ఉత్పత్తి చేస్తారు. కాగా 2012-13 ఆర్ధిక సంవత్సరానికి ఈ ప్రాజెక్టులో 20,448 మిలియన్‌ యూనిట్ల విద్యుత్‌ను ఉత్పత్తి చేయాలని వార్షిక లక్ష్యంగా నిర్ణయించారు. ఈనెల 31నాటికి ఈ ఉత్పత్తి లక్ష్యాన్ని సాధించాల్సి ఉండగా రామగుండం ఎన్టీపీసీ సూపర్‌ థర్మల్‌ ప్రాజెక్టులో మంగళవారం సాయంత్రం (మార్చి 26, 2013) వరకే వార్షిక లక్ష్యాన్ని అధిగమించి జాతీయ స్థాయి అభినందనలు పొందారు. ఈమేరకు రామగుండం ఎన్టీపీసీ ఉద్యోగులను, ఇంజనీర్లను జాతీయ స్థాయి ఎన్టీపీసీ అధికారులు ప్రత్యేకంగా అభినందించారు. దక్షిణ భారతదేశానికి వెలుగులు ప్రసాదిస్తున్న రామగుండం ఎన్టీపీసీ ప్రాజెక్టు అన్ని అవాంతరాలను అధిగమిస్తూ, విద్యుత్‌ ఉత్పత్తిలో ఎదురవుతున్న సవాళ్లను ధీటుగా ఎదుర్కొంటూ, రక్షణ తదితర నిబంధనలను నిక్కచ్చిగా పాటిస్తూ వార్షిక విద్యుత్‌ ఉత్పత్తి లక్ష్యాన్ని సాధించటం పట్ల సర్వత్రా హర్షం వ్యక్తం అవుతున్నది.

సింగరేణిలో ప్రారంభమైన పించనర్ల ఉద్యమం

 సింగరేణి సంస్థలో కూడా పించనుదారుల ఉద్యమం ప్రారంభమైంది. ప్రభుత్వ పించనర్ల మాదిరిగా సింగరేణిలో రిటైరైన కార్మికులందరికీ ప్రస్తుత ధరలకు అనుగుణంగా పింఛను పెంచాలని వారు కోరుతున్నారు. నాలుగు జిల్లాల్లో వ్యాపించిఉన్న సింగరేణి బొగ్గు గనుల్లో ఒకప్పుడు లక్ష మందికి పైగా కార్మికులు పనిచేసేవారు. కాగా సంస్థలో యాజమాన్యం చేపట్టిన నూతన సాంకేతిక విధానాలు, యాంత్రీకరణల కారణంగా వేలాది మంది కార్మికులను 'గోల్డెన్‌ షేక్‌ హాండ్‌', 'వాలంటరీ రిటైర్‌మెంట్‌' అదే నూతన విధానాల పేరిట యాజమాన్యం ఉద్యోగం నుంచి విరమణ చేయించింది. ఏళ్ల తరబడి బొగ్గు గనుల్లో కష్టపడి పనిచేసి అలసిన కార్మికులు ఈ పథకాల పట్ల ఆకర్శితులైనారు. అనారోగ్యపాలైన కార్మికులు, ఇక గనుల్లో అంతగా పనిచేయలేని కార్మికులు ఈ పథకాల కింద రిటైరైనారు. వీరు పదవీవిరమణ చేసిన సమయంలో వచ్చిన డబ్బులు మినహా, కార్మికులకు పింఛను సౌకర్యం లేదు. ఆ తర్వాత వేజిబోర్డు విధానాల్లో మార్పులు వచ్చిన కారణంగా, సింగరేణిలో అమలుచేస్తున్న పింఛను విధానానికి, ప్రభుత్వ పింఛను విధానానికి ఎంతో వ్యత్యాసం కనిపిస్తున్నది. ప్రభుత్వ పింఛను నెలకు కనీసం ఐదు వేల రూపాయలుండగా, సింగరేణి పింఛను మూడువందల రూపాయలు మాత్రమే చెల్లిస్తున్నారు. 'పింఛను' నిర్ణయించడంలో ప్రభుత్వ విధానాలను విడనాడి సింగరేణిలో ప్రత్యేక విధానాన్ని అనుసరిస్తున్నారు.

'బి-థర్మల్‌' విద్యుత్‌ కేంద్రం విస్తరణ డిమాండ్‌
అఖిల పక్ష నేతల 72 గంటల నిరాహార దీక్ష

బీ-థర్మల్‌ విద్యుత్‌ కేంద్ర విస్తరణ కోరుతూ అఖిలపక్ష పోరాట సమితి ఆధ్వర్యంలో స్థానిక బి పవర్‌హౌజ్‌ బైపాస్‌ రోడ్డు రాజీవ్‌ రహదారి పక్కన 72గంటల నిరవధిక నిరాహార దీక్షను చేపట్టారు. ఈ దీక్షలో టీఆర్‌ఎస్‌, టీడీపీ, సీపీఐఎంఎల్‌ న్యూడెమాక్రసీ, సీపీఐ, సీపీఎం, బీజేపీ, వైసీపీ, కాంగ్రేస్‌కు చెందిన కన్వినర్‌ కన్నూరి సతీష్‌కుమార్‌, లగిశెట్టి భీమన్న, తూళ్ల రాజేశ్‌, ఎండి.సాజిద్‌, పర్కాల లక్ష్మణ్‌, గీట్ల లక్ష్మారెడ్డి, కొమ్ము రాజమల్లు యాదవ్‌, బొడ్డుపల్లి శ్రీనివాస్‌, మార్త రామన్న, మోసం సదా, దూలం సతీశ్‌, నంది నారాయణ, ఉమా మహేశ్వర్‌, పెండ్యాల సతీశ్‌, వేల్పుల రవీందర్‌, షేక్‌ అఫ్జల్‌ పాషా, హీరాసింగ్‌లు కూర్చోగా, ముఖ్యఅతిథులుగా హాజరై జెన్‌కో ఎస్‌ఈ నర్సింహారావు, నాయకులు కోడిపుంజుల రాజన్న, మాతంగి శ్రీనివాస్‌, బొడకుంట జనార్ధన్‌, కొంకటి లక్ష్మినారాయణ, మాతంగి నర్సయ్య, ఉరిమెట్ల రాజలింగం, బుర్ర తిరుపతి, ఎం.రామాచారి, ఆవుల గోపాల్‌యాదవ్‌, నరేష్‌, గోపు అయిలయ్య యాదవ్‌, దీటి బాలరాజు, హైమద్‌ బాబు, పద్మనాభరావులు పూలమాల వేసి దీక్షను ప్రారంభించారు. కాగా వివిధ సంఘాల, పార్టీల నాయకులు, స్థానికులు వీరికి సంఘీభావం తెలిపారు. గతంలో 'రామగుండం టుడే' బ్లాగ్‌లో రామగుండం బి-థర్మల్‌ విస్తరణపై ప్రత్యేక వ్యాసాన్ని పోస్ట్‌ చేయడం జరిగింది. దీనికి సంబంధించిన వివరాల కోసం ఓల్డ్‌ పోస్ట్‌లను చదవండి.

గ్రూప్‌-2 విజేత ఇమామ్‌బాబా
అసిస్టెంట్‌ కమర్షియల్‌ టాక్స్‌ ఆఫీసర్‌గా 'ఖని' యువకుడు

Shaik Imam baba

గోదావరిఖని రమేష్‌నగర్‌కు చెందిన షేక్‌ ఇమామ్‌ బాబా ఎపీపీఎస్సీ ఇటీవల ప్రకటించిన గ్రూప్‌-2 ఫలితాల్లో సహాయ వాణిజ్య పన్నుల అధికారిగా ఎంపికయ్యాడు. ఇమామ్‌బాబా పదవ తరగతి వరకు స్థానిక వాసవ్య విద్యాలయంలో, ఇంటర్‌ ప్రభుత్వ జూనియర్‌ కళాశాలలో చదివాడు. బయోకెమిస్ట్రీలో పోస్టుగ్రాడ్యుయేషన్‌ వరంగల్‌ కాకతీయ విశ్వవిద్యాలయంలో పూర్తిచేశాడు. పీహెచ్‌డీ చేసేందుకు పరిశోధక విద్యార్ధిగా కూడా ఎంపికయ్యాడు. అటు ఉన్నత విద్యను కొనసాగిస్తూనే ఇటు పోటీ పరీక్షలకు ప్రయత్నాలు చేశాడు. ఈనెల 11న కమీషన్‌ విడుదల చేసిన గ్రూప్‌-2 ఫలితాలలో ఇమామ్‌బాబా ఎంపికైనట్లు పేర్కొన్నారు. వచ్చే వారంలో సర్టిఫికెట్‌ వెరిఫికేషన్‌ అనంతరం ఆయనకు నియామక ఉత్తర్వులు అందజేస్తారు. ఇమామ్‌బాబా అసిస్టెంట్‌ కమర్షియల్‌ టాక్స్‌ ఆఫీసర్‌గా ఎంపిక కావడంపై కుటుంబ సభ్యులు, రమేష్‌నగర్‌ వాసులు, వాసవ్య విద్యాలయం ఉపాధ్యాయ బృందం హర్షం వ్యక్తం చేశారు.